Iaurdanes

BI ANASTODEIN DEDINZUH GUTANE


Skeiriþ ist þis saihstis dailis af "Getica" bokarjos Iaurdanes, þairh gadailans þis
Gothic language list (Gothic-l)
Giuseppe Pagliarulo, Matthew Carver, Tim O'Neill Francisc Czobor, Gerry Taylor, Brian Beck & Sean Crist.

Þanuh us þizai Skadinaujon swe us smiþjon aljakunje aiþþau aufto swe us kilþein þiudo miþ þiudana seinamma, namin Baireiks, Gutans spillondau airis þau usgaggan: þaiei sunsei af skipam afsteigandans grundu attaitokun, anaks gebun stada namo seinata. Jah auk himma daga, swe merjada, haitada jainar Gutaskadinaujo. Þaþro suns ushafjandans sik du bauainim Hulmarugje, þaiei þan in markai Okaianei salidedun, gahlijadedun instagqandinuh ins usdribun us bauainim ize, juþ-þan uswaltjandans garaznans ize Wandalos biaiaukun sigizam seinaim. Þan sunjaba mikilai raþjon manne wahsjandein jah ju gaþiudanondin swe fimftin afar Baireik Filumera sunau Gadareikis, sa garuni nam ei jainþro afliþi miþ fadreinim Gutane harjis, saei sokjands heiwa fagrosta stadinzuh gadobans qam du landam Skwþjos þoei Aujo haitana wesun ana razdai ize, þarei waila galeikaida in gabein mikilai þize gaujane; jah qiþand þatei brugjo, þairh þoei ahva ufarfor sa harjis halba, disskritnoda swaei ni aftra gabotnan mahta fram ainummehun, nih ju mannhun maht was gaggan nih qiman. Auk sa staþs, swe merjada, gawagjandam moram afgrundiþai biwaibjandein inlukniþ, þanei baim gablandim wists galauk. Aþþan sweþauh jah himma daga weitwodiþa wratonarje, þauhjabai fairraþro hausjandane, galaubjan mahta jainar stibnos faihaus hausjan mairkonah manne finþan. So dails nu Gutþiudo ei Filumera qiþada in land Aujo ahvai ufarfaranai baurans warþ, gaaiginodedun kusanata land, þanuh sunsaiw qimand du þiudai Spalam sakjonuh gawundanein sigis gitand, þaþroh ju swe sigwjandans duatsniwun du aftumistai dailai Skwþios, þizaiei Pauntau marein nehvundja ist; swaswe jah in liuþam seinaim alþizaim swe spillaleiko allis sidoda. Þatei jah Ablabjus usmelareis merosts kunjis Gutane anakauseiþ triggwostamma spilla, in domei jah sinistai managai gaqeþun: Iosefuh jeraboko spillareis triggwosts, witoþ sunjos and all gabairgands anastodeininzuh waihte af frumistamma gaskeirjands. Bi sunjai, duhve anastodein þo þiudos Gutane, þoei gatihum, is ufarmunnoda, ni witum. Iþ þatainei Magog gamaudjands us kunja ize, qiþiþ þatei Skwþjus haitanai wesun þiudai naminuh, þizei ainis markos, faurþizei at anþaramma midjamma usbairaima, swaswe ligand þaurft ist gabairhtjan.